Беларускія і замежныя ваенна-гістарычныя рэканструктары на досвітку 22 чэрвеня рэканструююць ключавыя эпізоды абароны Брэсцкай крэпасці. Аб гэтым паведамілі карэспандэнту БЕЛТА арганізатары.
Упершыню рэканструкцыю абароны легендарнай цытадэлі над Бугам правялі ў 2011 годзе. З той пары яна стала неад'емнай часткай мерапрыемстваў, якія праводзяць у Брэсце да Дня ўсенароднай памяці ахвяр Вялікай Айчыннай вайны і генацыду беларускага народа. У бягучым годзе ў ёй прымуць удзел каля 600 чалавек: прадстаўнікоў ваенна-гістарычных клубаў і творчых калектываў.
Некаторыя рэканструктары прыехалі ўжо ў абласны цэнтр. Асноўная ж маса ўдзельнікаў заселіцца ў палявы лагер 20 чэрвеня. Большасць з іх - з розных рэгіёнаў Беларусі і Расіі. Пра сваё жаданне разам з аднадумцамі аднавіць эпізоды абароны Брэсцкай крэпасці заявілі прадстаўнікі Эстоніі, Латвіі, Літвы, Польшчы, іншых краін.
Рэканструкцыю нязменна праводзяць на тэрыторыі Кобрынскага ўмацавання Брэсцкай крэпасці. Напярэдадні ўдзельнікі правядуць дзве рэпетыцыі. "Ужо вясной пачынаем рыхтавацца, працуем са сцэнарыем, творчымі нумарамі. Бо рэканструкцыя ўключае не толькі паказ асноўных баявых дзеянняў. Яна перарасла ў тэатралізаваны паказ. Канцэпцыяй займаецца рэжысёрска-пастановачная група Брэсцкага абласнога цэнтра маладзёжнай творчасці", - расказаў дырэктар Брэсцкага абласнога цэнтра маладзёжнай творчасці Віктар Іваноў.
У час рэканструкцыі плануюць задзейнічаць танк, бронеаўтамабіль, аўтамабілі, матацыклы, самалёт Ан-2, кавалерыю. Будуць выкарыстоўваць піратэхніку. Непасрэдна на пляцоўцы завяршаецца падрыхтоўка дэкарацый. Брэсцкія пагранічнікі ўзнаўляюць неабходныя дэталі: абсталёўваюць лінію ўзмацнення граніцы, пагранзаставу, акопы, дзот. Гледачам пакажуць фрагменты апошняга мірнага дня ў чэрвені 1941 года, вераломнага нападзення нямецка-фашысцкіх захопнікаў, здачы ў палон мірных жыхароў, гераічнай абароны цытадэлі. Драматычны эфект у фінале ўзмоцніць кампазіцыя "А сыны ідуць у бой".
Арганізатарамі ваенна-гістарычнай рэканструкцыі "22 чэрвеня 1941 года. Брэсцкая крэпасць" з'яўляюцца Брэсцкія абласны і гарадскі выканаўчыя камітэты пры падтрымцы Міністэрства абароны, Брэсцкага абласнога ваеннага камісарыята, воінскіх часцей Брэсцкага гарнізона і Брэсцкай пагранічнай групы, абласнога цэнтра маладзёжнай творчасці, абласной арганізацыйнай структуры ДТСААФ.-0-
