У Беларусі трэба пашыраць сетку атрадаў народнага апалчэння. Аб гэтым Прэзідэнт Беларусі Аляксандр Лукашэнка заявіў у Верхнядзвінскім раёне ў час наведвання вучэбна-трэніровачных заняткаў аднаго з такіх атрадаў, перадае карэспандэнт БЕЛТА.
Народнае апалчэнне павінна базіравацца ў пэўных вёсках у сельскім савеце, адзначыў Прэзідэнт. "У вас адно падраздзяленне, добрае падраздзяленне. Але гэтага мала. І трэба нам пашырацца. Трэба недзе яшчэ ствараць такія базавыя атрады. Яны павінны быць звязаны паміж сабой", - сказаў кіраўнік дзяржавы.
Аляксандр Лукашэнка нагадаў, што раней даручыў кіраўніку Беларускага таварыства паляўнічых і рыбаловаў Ігару Шуневічу прыцягваць у народнае апалчэнне людзей, якія ўмеюць абыходзіцца са зброяй, і стварыць своеасаблівую брыгаду.
Прэзідэнт адзначыў, што народнае апалчэнне патрэбна, каб людзі ў выпадку ваеннага часу маглі абараніць сябе, сваю сям'ю, свой населены пункт.
"Чаму я імкнуўся стварыць народнае апалчэнне? Я не хачу, каб тут кожны другі загінуў, як гэта было некалі ў гады Вялікай Айчыннай вайны - палову насельніцтва выразалі, а мы нічым не адказалі. А гэтыя хлопцы заўсёды адкажуць, - сказаў Аляксандр Лукашэнка. - Мы ж мужыкі. Нават калі нам давядзецца загінуць, то з сабой туды мы забяром дваіх-траіх, калі ў яго (байца народнага апалчэння. - Заўвага БЕЛТА) будзе кулямёт, аўтамат, пісталет, гранаты і гэтак далей. Мы - мужыкі, мы павінны валодаць стралковай зброяй і павінны абараніць саміх сябе і сваю сям'ю. Зразумела, сваю вёску".
"Гэта ў самым нізе народнае апалчэнне. Далей тэрытарыяльная абарона - ахова інфраструктурных аб'ектаў. Народнае апалчэнне, тэрытарыяльная абарона і наверсе армія. Армія будзе забяспечвацца ўсім неабходным. Вядома, уся гэта структура пад камандаваннем і кіраўніцтвам Прэзідэнта. І я за гэтым буду сачыць і сачу, каб у вас была зброя", - заявіў беларускі лідар.
"Ствараючы гэту структуру, я меў на ўвазе, што ў кожным сельсавеце павінен быць атрад народнага апалчэння. Гэта ядро. У выпадку ваенных дзеянняў гэта ядро можа пашырацца. База, на якой ствараецца народнае апалчэнне, - гэта сельскі савет. Узбраенне для вас нарыхтавана. Гэта справа ваенных. Аўтамат, гранаты, кулямёт вы будзеце мець. А тут яшчэ БПЛА (выкарыстоўваецца пры падрыхтоўцы гэтага атрада. - Заўвага БЕЛТА). Гэта добра, што вы асвоілі беспілотнікі, таму што вы як пагранічнікі - на краі. У вас тут краіна НАТА побач. Не дай бог, вядома, нам ваяваць з імі. Але тым не менш мы павінны быць гатовы", - сказаў Аляксандр Лукашэнка.
Прэзідэнт расказаў, што ў бліжэйшы час ён на адным з участкаў азнаёміцца з дзеяннямі тэрытарыяльнай абароны. Пры гэтым асаблівая ўвага будзе ўдзелена пытанням наяўнасці і захаванасці зброі, якая ёсць у запасе на выпадак вайны і прызначана ў тым ліку для народнага апалчэння. "Я хачу, каб у нас у цэлым грамадства магло абараніць сваю краіну, - сказаў беларускі лідар. - Цяпер узварухнём гэта ўсё, мы яшчэ раз пераправерым іх баявую зброю".
Прэзідэнт паразмаўляў з байцамі атрада і даў некалькі парад па падрыхтоўцы: "Галоўнае - гэта нават не стральба. Галоўнае - гэта фізічная падрыхтоўка - умець бегаць, думаць галавой, утаіцца, збегчы, схавацца і забіць ворага. Вы павінны навучыцца "ўхіляцца ад кулі".
Атрад народнага апалчэння, за трэніроўкай якога назіраў Прэзідэнт, створаны на базе паляўнічай гаспадаркі "Чырвоны бор". У яе складзе - работнікі гэтай гаспадаркі і аднайменнага турыстычнага комплексу.
Камандзір атрада народнага апалчэння Максім Андрыеўскі ў мінулым прафесійны ваенны, мае за плячамі вопыт службы ў спецпадраздзяленні. Ён расказаў, што трэніроўкі атрада праводзяцца штотыдзень, а ў летні час арганізуюць паўнацэнныя зборы працягласцю тры тыдні. Асаблівая ўвага ўдзяляецца спецыяльнай фізічнай падрыхтоўцы, рукапашнаму бою, фарміраванню навыкаў абыходжання са зброяй.
У складзе атрада мясцовыя жыхары самых розных прафесій. Гэта не прафесійныя ваенныя, але дзякуючы падрыхтоўцы ў патрэбны момант яны не разгубяцца і змогуць стаць на абарону радзімы.-0-