Анфімаў адзначыў належныя ўмовы падрыхтоўкі да выбараў дэпутатаў у Беларусі

6 лютага, Мінск /Кар. БЕЛТА/. Кіраўнік штаба місіі наглядальнікаў ад СНД Леанід Анфімаў адзначыў належныя ўмовы падрыхтоўкі да выбараў дэпутатаў у Палату прадстаўнікоў і мясцовыя Саветы дэпутатаў у Беларусі. Аб гэтым ён заявіў журналістам перад сустрэчай з намеснікам генпракурора Беларусі Максімам Вароніным, на якой абмяркоўвалася падрыхтоўка да адзінага дня галасавання, перадае карэспандэнт БЕЛТА.

На падставе матэрыялаў, якія прадастаўляюць доўгатэрміновыя наглядальнікі, можна меркаваць, што "ўмовы створаны належныя, ёсць неабходныя агітацыйныя матэрыялы, спісы выбаршчыкаў, вядзецца растлумачальная работа ўчастковымі выбарчымі камісіямі пры звароце грамадзян наконт маючага адбыцца галасавання", сказаў Леанід Анфімаў, папярэдне ацэньваючы ўмовы для правядзення адзінага дня галасавання.

Што датычыцца сённяшняй сустрэчы ў Генпракуратуры, то кіраўнік штаба місіі адзначыў, што паводле існуючай практыкі ў перыяд праходжання электаральнай кампаніі накіроўваюцца пісьмы ў адпаведныя дзяржаўныя органы, якія забяспечваюць правапарадак пры правядзенні выбараў і разглядзе скаргаў і зваротаў грамадзян, у тым ліку кандыдатаў у дэпутаты, на магчымыя парушэнні дзеючага заканадаўства.

Ужо на сустрэчы Максім Варонін адзначыў канструктыўнае ўзаемадзеянне органаў пракуратуры з місіяй наглядальнікаў ад СНД. Паводле яго слоў, місія вельмі важная для ацэнкі, кантролю правядзення выбараў. "Адпаведна, мы сумесна зацікаўлены ў забеспячэнні законнасці", - сказаў ён.-0-