Бяспека і эканоміка. Алейнік падзяліўся падрабязнасцямі пасяджэння СМЗС СНД у Бішкеку

12 кастрычніка, Бішкек /Кар. БЕЛТА/. Пасяджэнне ў Бішкеку Савета міністраў замежных спраў СНД пацвердзіла нацэленасць усіх без выключэння краін умацоўваць патэнцыял Садружнасці, развіваць вымярэнні інтэграцыйнага ўзаемадзеяння. Аб гэтым па выніках мерапрыемства заявіў журналістам міністр замежных спраў Беларусі Сяргей Алейнік, перадае карэспандэнт БЕЛТА.

"Мы ўдзялілі шмат увагі і пытанням бяспекі. Удзялілі вельмі вялікую ўвагу пытанням эканамічнага супрацоўніцтва. Зусім нядаўна было падпісана пагадненне аб свабодным гандлі паслугамі, прыняты шэраг прапаноў Беларусі ў комплексны план па выкліках у эканамічнай сферы. У верасні Эканамічны савет СНД прыняў дадатковыя рашэнні па ўмацаванні галіновага ўзаемадзеяння ў эканамічным супрацоўніцтве паміж краінамі СНД. І мы, вядома, удзяляем гэтым пытанням вельмі вялікую ўвагу, таму што эканамічная ўстойлівасць, самадастатковасць Садружнасці - залог стабільнага працвітання і развіцця нашых дзяржаў", - сказаў кіраўнік МЗС.

На пасяджэнні была ўдзелена ўвага і тэме ўзаемнага гандлю. Сяргей Алейнік прывёў даныя, што аб'ём гандлю паміж Беларуссю і краінамі СНД за 8 месяцаў гэтага года вырас да $33 млрд. "Гэта 12,5 працэнта росту. У грашовым вылічэнні - плюс $3,7 млрд у параўнанні з мінулым годам, - адзначыў міністр. - Такія паказчыкі гавораць самі за сябе. Усе краіны Садружнасці пацвярджаюць нацэленасць на ўмацаванне эканамічнага ўзаемадзеяння, прамысловай кааперацыі, забеспячэнне тэхналагічнага суверэнітэту. На гэтым грунтуецца ўзаемны рост гандлю і развіццё ўсіх астатніх вымярэнняў эканамічнага ўзаемадзеяння, уключаючы транспартна-лагістычныя калідоры, сістэму разлікаў, якая ўстойліва рухаецца ў бок пераходу на нацыянальныя валюты. Аб'ём разлікаў у нацыянальных валютах складае ўжо каля 80 працэнтаў. Думаю, гэта тэндэнцыя будзе прадаўжацца".

Паводле слоў міністра, усе краіны СНД адзіныя ў разуменні неабходнасці ўмацоўваць патэнцыял Садружнасці ў якасці сур'ёзнай апоры шматпалярнага свету. "Супярэчнасці ў дыпламатычнай практыцы - рэч звычайная. Яны заўсёды былі і ёсць. Але нам удаецца знаходзіць кампрамісныя фармулёўкі, рашэнні практычна па ўсіх пытаннях парадку дня, - запэўніў кіраўнік беларускага МЗС. - На сённяшні дзень вельмі востра стаіць пытанне салідарнасці, з'яднанасці, аб'яднальнага і стваральнага парадку дня ў Садружнасці. Да гэтага нас падштурхоўваюць асаблівасці бягучага геапалітычнага развіцця, незаконныя аднабаковыя меры, якія прымаюцца краінамі Захаду ў адносінах да шэрага краін СНД, уключаючы Беларусь. Гэтаму мы таксама ўдзялялі ўвагу. І, вядома, гэты аб'яднальны парадак дня будзе толькі ўмацоўвацца".

Сяргей Алейнік расказаў, што ў ходзе маючай адбыцца 13 кастрычніка ў Бішкеку сустрэчы кіраўнікоў дзяржаў СНД прадугледжваецца абмен меркаваннямі па найбольш актуальных пытаннях рэгіянальнага і міжнароднага парадкаў дня, па тэме ўмацавання патэнцыялу Садружнасці. "Мы сёння падрыхтавалі чатыры праекты заяў, якія, разлічваем, будуць адобраны кіраўнікамі дзяржаў. Адна з іх якраз датычыцца пытанняў справядлівага глабальнага развіцця, фарміравання шматпалярнага свету", - заявіў кіраўнік МЗС.

Па выніках пасяджэння СМЗС вырашана, што наступны раз міністры збяруцца ў Мінску 12 красавіка 2024 года. "Мы з нецярпеннем будзем чакаць нашых калег, партнёраў і рыхтаваць субстантыўны парадак дня для гэтай сустрэчы", - дадаў Сяргей Алейнік.-0-