Павышэнне зарплат бюджэтнікам, афармленне зямельных участкаў без аўкцыёну, выплата падаткаў па-новаму - гэтыя і іншыя змяненні ўступяць у сілу ўжо з 1 студзеня. Раскажам аб тых, якія закрануць амаль кожнага жыхара нашай краіны.
У бюджэтнікаў вырасце зарплата
Памер базавай стаўкі павялічыцца да Br228. А паколькі да яе прывязана сістэма каэфіцыентаў і даплат, то ў бюджэтных арганізацыях вырасце зарплата - яе мінімум складзе Br554.
Новаўвядзенні закрануць і аплату працы работнікаў аховы здароўя, адукацыі і культуры. У настаўнікаў, выкладчыкаў, майстроў вытворчага навучання ўстаноў адукацыі зарплаты павялічацца на 6 працэнтаў ад акладу, для прафесарска-выкладчыцкага складу - на 15 працэнтаў ад акладу. Педагагічным работнікам з культурнай галіны, якія былі залічаны ў рады адоранай моладзі, вучыліся на бюджэце і атрымалі размеркаванне, належыць прыбаўка 45 працэнтаў ад акладу. Надбаўка за работу ў сферы аховы здароўя ўрачам-спецыялістам павялічана на 55 працэнтаў, сярэднім медработнікамі - на 50 працэнтаў, надбаўка іншым работнікам аховы здароўя (інжынерам, фізікам, хімікам, інструктарам-метадыстам фізічнай рэабілітацыі, фармацэўтычным работнікам і інш.) павялічана на 50 працэнтаў.
Змяненні ў пытанні зямельных участкаў
Нормы абноўленага Кодэкса аб зямлі дазволяць атрымліваць дадатковыя ўчасткі без аўкцыёну і без рэканструкцыі жылых дамоў. Акрамя таго, стане магчымым змяніць мэтавае прызначэнне ўчастка, адведзенага для ўзвядзення і абслугоўвання аб'екта, яшчэ да завяршэння яго будаўніцтва.
Новаўвядзенне плануецца і адносна ажыццяўлення здзелак з участкамі, якія можна будзе адчужаць пры выкананні шэрага ўмоў. Пакуль пусты зямельны ўчастак нельга прадаць, з 1 студзеня - можна. Пры гэтым адна з важных умоў - тэрмін будаўніцтва аб'екта павінен застацца ранейшым.
Падаткі і льготнікі
Асноўныя падаткі мы будзем плаціць па тых жа правілах. Але ёсць нюансы. Новым Падатковым кодэксам вылучаны льготнікі, для якіх стаўкі транспартнага падатку зніжаны, у тым ліку ў два разы - для шматдзетных сем'яў і ўдзельнікаў баявых дзеянняў на тэрыторыі замежных дзяржаў. Важная ўмова: 50-працэнтная льгота можа быць прадастаўлена толькі пры наяўнасці дзеючага вадзіцельскага пасведчання адпаведнай катэгорыі.
Змяненні больш за ўсё закрануць прадпрымальнікаў і самазанятых. ІП страчваюць права на прымяненне спрошчанай сістэмы падаткаабкладання ў цэлым. Цяпер у іх два рэжымы падаткаабкладання - падаходны падатак і адзіны падатак. Для самазанятасці з'явіцца падатак на прафесійны даход.
Павялічыцца выплата сямейнага капіталу
На выплату сямейнага капіталу ў 2023 годзе прадугледжана Br429 млн. Паводле ацэнак, гэтымі выплатамі скарыстаюцца больш за 13,8 тыс. сем'яў. Пры гэтым памер сямейнага капіталу павялічыцца на Br4341 і складзе Br30 336.
Навацыі для людзей з інваліднасцю
З 6 студзеня ўступае ў сілу закон "Аб правах інвалідаў і іх сацыяльнай інтэграцыі". Сярод ключавых навацый - шырокае ўкараненне інфармацыйных тэхналогій у інтэрнэце, сістэмная платформа стварэння даступнага асяроддзя. Апошняя ўяўляе сабой дарожную карту забеспячэння даступнасці аб'ектаў, інфраструктуры, транспарту і паслуг для ўсіх катэгорый інвалідаў. У агульным доступе з'явяцца звесткі аб безбар'ерным асяроддзі ў маштабах краіны ў цэлым, а таксама ў канкрэтным населеным пункце.
Пашырыцца пералік катэгорый інвалідаў, якія маюць права на бясплатнае або льготнае забеспячэнне сродкамі рэабілітацыі. Акрамя таго, з'явяцца ўстановы новага тыпу - цэнтры сацыяльнай рэабілітацыі і абілітацыі інвалідаў. Дакумент прадугледжвае пашырэнне інклюзіі ў адукацыйным працэсе, стварэнне дадатковых механізмаў працаўладкавання і занятасці людзей з абмежаванымі магчымасцямі. Напрыклад, будуць кватавацца працоўныя месцы для людзей з інваліднасцю, да двух гадоў павялічыцца тэрмін адаптацыі да працоўнай дзейнасці для інвалідаў з інтэлектуальнымі парушэннямі.
Жыллё для ваеннаслужачых
Ваеннаслужачыя ў Беларусі змогуць бясплатна атрымаць ва ўласнасць арэнднае жыллё пасля 25 гадоў службы. Механізм перадачы апісаны ў адпаведным нарматыўным акце. Паводле разліку, каля 700 тыс. кв.м жылля неабходна для ваеннаслужачых. У планах урада пабудаваць адпаведныя аб'ёмы на працягу 2023 года і першай паловы 2024-га. Дарэчы, за апошнія некалькі гадоў аб'ёмы ўзвядзення арэнднага жылля для ваеннаслужачых былі ў разы меншыя.
Купіць лякарства ў інтэрнэце
Аптэкі змогуць прадаваць лякарствы праз свае інтэрнэт-сайты. Пакуль гэта датычыцца толькі безрэцэптурных лякарстваў, але пасля ўвядзення электроннай аховы здароўя будзе разгледжана пытанне аб рэалізацыі і рэцэптурных прэпаратаў. У законе аб ліцэнзаванні з'явілася норма, якая дазваляе пры выязных медаглядах прадаваць лякарствы ў перасовачных медкомплексах.
Экскурсаводу спатрэбіцца атэстацыя
Уводзіцца забарона на правядзенне экскурсій асобай, якая не мае адпаведнай атэстацыі. У самім працэсе атэстацыі нічога істотна не зменіцца. Яна па-ранейшаму будзе праходзіць на базе Нацыянальнага агенцтва па турызме ў два этапы.
Першы заключаецца ў праходжанні камп'ютарнага тэсціравання, якое ўключае розныя дысцыпліны - гісторыю, геаграфію, літаратуру, мову, а таксама манеру падачы. Другі этап - непасрэдная абарона канкрэтнай экскурсіі. У кожнага экскурсавода пры сабе павінен прысутнічаць бэйдж з пазначэннем маршруту, па якім гэты гід праходзіў атэстацыю. Атэстацыя будзе выдавацца на пяць гадоў.
Алена НІКАЛАЕВА,
газета "7 дней".-0-