10 лістапада, Мінск /Кар. БЕЛТА/. Прафсаюзы абмеркавалі законапраект аб УНС амаль у 4 тыс. арганізацый краіны. Аб гэтым расказаў старшыня Федэрацыі прафсаюзаў Беларусі Міхаіл Орда ў час размовы з маладымі людзьмі - старшынямі пярвічных прафсаюзных арганізацый і сакратарамі БРСМ з усіх ВНУ краіны. Аб гэтым БЕЛТА паведамілі ў прэс-службе ФПБ.
Практыка грамадскага абмеркавання важнейшых законапраектаў для Беларусі распаўсюджана. Так, масава праходзіла, напрыклад, абмеркаванне змяненняў і дапаўненняў у Канстытуцыю.
"Сёння мы на аснове рэальнага вопыту бачым і разумеем, што важнейшыя законапраекты, якія вызначаюць далейшае развіццё краіны, павінны прымацца менавіта такім чынам - праз шырокае абмеркаванне. У якім могуць прымаць удзел і прафесійныя юрысты, і звычайныя грамадзяне. Кожны можа выказаць сваё меркаванне, унесці прапанову. Так і фарміруецца грамадзянская адказнасць чалавека", - расказаў Міхаіл Орда.
Прафсаюзы заўсёды актыўна ўключаюцца ў гэту работу. "Фактычна за няпоўныя два тыдні мы правялі абмеркаванне гэтых законапраектаў амаль у 4 тыс. арганізацый. Па-рознаму гэта праходзіла. Недзе гэта былі вялікія пляцоўкі на 300 чалавек, недзе больш кулуарныя, калі збіралі па цэхах, аддзяленнях прадстаўнікоў працоўных калектываў. Рэакцыя людзей, вядома, таксама была розная: хтосьці ўжо сам азнаёміўся, хтосьці ўпершыню чуў пра законапраекты. Але нават тыя, хто першапачаткова са скепсісам адносіўся да законапраекта, у выніку, паслухаўшы каментарыі і тлумачэнні, паглядзеў на дакумент па-іншаму. І ў гэтым таксама вялікі сэнс такога шырокага абмеркавання. Каб людзі ведалі аб дакументах, якія прымаюцца, не па ўрыўках нейкіх звестак, пачутых ад суседа або сваяка і тым больш не па фэйкавых навінах, а самі паглыбляліся ў яго вывучэнне, чулі меркаванні экспертаў, юрыстаў", - адзначыў старшыня ФПБ.
Як падкрэсліў Міхаіл Орда, асабліва актыўна выказвалася моладзь. У першую чаргу гэта сведчыць аб тым, што маладым людзям не ўсё роўна. Яны разумеюць важнасць такога ўсенароднага сходу і гатовы ўдзельнічаць у яго рабоце. Дарэчы, пытанне аб вылучэнні сваёй кандыдатуры на УНС асабліва часта задавалі менавіта прадстаўнікі моладзі. Таксама нярэдка выказвалася меркаванне, што ва УНС у абавязковым парадку павінны быць прапарцыянальна прадстаўлены грамадзяне ўсіх узростаў, каб не было перакосу ў той ці іншы бок.-0-