Сергяенка: моладзі неабходна паказваць і растлумачваць гістарычнае значэнне Дня народнага адзінства

6 верасня, Гомель /Кар. БЕЛТА/. Моладзі неабходна паказваць і растлумачваць гістарычнае значэнне Дня народнага адзінства. Такі пасыл абазначыў кіраўнік Адміністрацыі Прэзідэнта Ігар Сергяенка на сустрэчы з калектывам кандытарскай фабрыкі "Спартак" і з ідэалагічным актывам Гомеля, перадае карэспандэнт БЕЛТА.

Кіраўнік Адміністрацыі наведаў сёння СП ААТ "Спартак". Ігар Сергяенка адзначыў, што рады пабываць на прадпрыемстве і сустрэцца з яго калектывам. Ён азнаёміўся з кандытарскай вытворчасцю.

Тэма сустрэчы звязана з гісторыяй Дня народнага адзінства. Таксама Ігар Сергяенка коратка расказаў аб унутрыпалітычнай і эканамічнай сітуацыі, якая складваецца па знешняй дузе.

Калектыву прадпрыемства прадставілі архіўныя дакументальныя кадры аб злучэнні заходняй і ўсходняй частак Беларусі ў 1939 годзе. Чорна-белая здымка з закадравым каментарыем нагадала гістарычную хроніку. Нягледзячы на польскі прыгнёт, беларускі народ не скарыўся. Ужо тады быў створаны партызанскі рух, дзейнічала падпольная суполка.

Ігар Сергяенка падкрэсліў, што ідэя аднавіць гэта свята прагучала на УНС і падтрымана кіраўніком дзяржавы. "Тэму адзінства абвастрылі падзеі 2020 года. І гэта тэма не была навязана, яна ініцыявана народам. Трэці раз мы адзначым гэту дату ў навейшай гісторыі. Праводзяцца акцыі, сустрэчы, дыялогавыя пляцоўкі, мерапрыемствы, прымеркаваныя да яе. Нам трэба паказваць і расказваць моладзі аб значнасці таго перыяду, тлумачыць, чаму гэты дзень мае такое ж гучанне, як і Дзень Незалежнасці і іншыя святы, якія, як раней гаварылі, адзначаны чырвоным колерам у календары", - сказаў ён.

Паводле слоў кіраўніка Адміністрацыі Прэзідэнта, адзінства народа - рухаючая сіла. "Нягледзячы на санкцыі, краіна рухаецца наперад. Сёння мы гаворым, што наша прамысловасць і сельская гаспадарка развіваюцца, пры гэтым захоўваецца ўпэўненая сацыяльная накіраванасць. Толькі з пачатку гэтага года тройчы павышаліся пенсіі", - адзначыў ён.

Таксама Ігар Сергяенка адказаў на пытанні работнікаў прадпрыемства, заклікаўшы да адкрытага дыялогу. "Для нас няма другарадных тэм, усе пытанні жыццёвыя", - падкрэсліў ён. Так, закрануты тэмы ўзвядзення помніка народнаму адзінству, эканамічнага развіцця, прыгранічнага контуру і вытворчых новаўвядзенняў.-0-