Да акцыі "Адновім лясы разам!" за тры тыдні правядзення далучыліся звыш 56,5 тыс. удзельнікаў. Аб гэтым паведамілі БЕЛТА ў прэс-службе Мінлясгаса.
"Добраахвотнікі па ўсёй краіне працавалі больш як на 3 тыс. аб'ектаў. У традыцыйных лідарах па колькасці - Мінская вобласць. Тут кампанію па стварэнні новых лясоў падтрымалі амаль 14 тыс. чалавек. За час правядзення акцыі ўжо высаджана больш за 27 млн дрэў", - адзначылі ў прэс-службе.
У ведамстве нагадалі, што кампанія прадоўжыцца да 20 красавіка ўключна. Далучыцца да яе можа любы жадаючы, для гэтага дастаткова звярнуцца ў бліжэйшы лясгас або лясніцтва.
Лясгасы прагназуюць, што найбольш масавым днём удзелу ў акцыі стане менавіта 20 красавіка, паколькі ў гэты дзень у краіне будзе праходзіць рэспубліканскі суботнік. Многія калектывы вырашылі скарыстацца прапановай арганізацый галіны і стварыць у гэты дзень лясныя культуры ў сваіх рэгіёнах.
